У апошнюю суботу лістапада Лідзкая ТБМ ладзіла літаратурную сустрэчу для маленькіх сяброў клюбу “Спадчына” ў вёсцы Дварэц, што знаходзіцца на поўдзень ад райцэнтра Дзятлава. На сустрэчу былі запрошаны лідзкі паэт, старшыня Лідзкай гарадзкой арганізацыі ТБМ Станіслаў Суднік, а таксама паэт і сябра Лідзкай гарадзкой Рады ТБМ Кірыл Сыцько. Гісторыка-патрыятычны клюб “Спадчына” быў заснаваны настаўніцай дварэцкай школкі спадарыняй Натальляй, без яе не было б ні клюбу, ні цудоўных дзетак, якія шануюць родную мову і гісторыю. Сустрэлі яны лідскіх сяброў ужо на парозе школы, дзе ладзілася імпрэза. Пачалося ўсё з выкананьня неафіцыйнага гімна клюбу, якім з’яўляецца песьня на верш Максіма Багдановіча “Пагоня”. Першая частка сустрэчы складалася з расповяду дзетак аб іх дзейнасьці, акцыях, сустрэчах, падарожжах. Сярод гэтых малых стоадсоткава растуць будучыя беларускія паэты і паэткі - прагучалі іх першыя вершы, якія спадар Сыцько назваў цудоўнымі. Ён падзяліўся сваімі плянамі аднавіць выданьне газеты моладзі ТБМ “Прадмова” і прапанаваў дасылаць свае творы на яго паштовую скрыню для друку.
Другая частка імпрэзы ўяўляла сабой чытаньне вершаў аўтарамі і размову з слухачамі. Адзначым, што літаратурная сустрэча праходзіла жыва і цікава, лідчане жартавалі, таму настрой быў у ва ўсіх сьвяточны. Пасля таго, як выступоўцы сконьчылі чытаць вершы, маленькія сябры клюба завалілі іх сваімі пытаньнямі. Цікава ім было ўсё: і пра погляд паэтаў на будучыню мовы і культуры Беларусі, і пра іх асабістыя моманты жыцця. Госьці з Ліды падаравалі клюбу свае зборнікі вершаў, усе нумары “Лідзкага летапісца” і іншыя выданьні.
Адзначым таксама і гасьціннасьць маладзёнаў з Дварца, якія пасля сустрэчы частавалі гасцей гарбатай, за якой праляцела шчэ добрая гадзіна ў свабоднай сяброўскай атмасферы. Час праляцеў незаўважна і пасля чатырох гадзін госці развіталіся з маленькімі беларусамі. Імпрэза ўдалася! Усё прайшло выдатна і сустрэча, спадзяемся, была не апошняя.
Выдатна, што ў вёсцы з насельніцтвам меньш за тысячу жыхароў ёсьць такія людзі. Гэта будучыня Беларусі і буйнаму райцэнтру Ліда, з яго ста тысячамі жыхароў, ёсць чаму павучыцца ў маленькіх сяброў. Застаецца толькі пажадаць светлай будучыні гэтым светлым людзям!

Фота:

Дадаць Каментар  |  Назад  |  Да ўсіх навін

Імя:
Ваш E-mail:
Каментароў: